إلى كل أعداء عبدالناصر الجهلاء الذين يرددون الكلام السماعى المرسل - بقلم : طارق صلاح الدين

دون أدلة ولافهم……….
الأثرياء جمعوا أموالهم بالكد والعمل؟
طب أثبت لنا البدراوى عاشور جاب 65 ألف فدان منين؟…واخد بالك 65 ألف…..وسراج الدين جاب 60 ألف فدان منين؟…لومعرفتش تجاوب مش عيب هبقى أنا اقولك جابوهم منين…..
مصر كانت دولة مانحة لمين؟
لبريطانيا؟…اوعى تكون مصدق حكاية كنا مداينين انجلترا لحسن احكي لك الحكاية فتضرب ملوك أسرة محمد على بالجزمة والمصدر الرافعى…..
حكاية بقى بقينا دولة مدينة لطوب الأرض دى عبدالناصر ليس له دخل بها لأنه مات 1970 وديون مصر 1.4 مليار دولارديون عسكرية لروسيا تكلفة إعادة بناء القوات المسلحة وروسيا تنازلت عنها ولم تحصل عليها أبدا….دور بقى لوحدك على السادات ومبارك لحد النهاردة وافصل عبدالناصر عنهم….
نفسى أعرف جبت منين حكاية هزيمة نكراء فى 1956؟
هو لما تسترد قناتك اللى هى اهم ممر ماءى عالمى وأعظم قوى فى الأرض تعلن عليك الحرب وتتمكن انت من طردهم لتانى مرة من بلادك بعد خروجهم عام 1954 باتفاقية الجلاء تبقى هزيمة نكراء؟
لما رجال بورسعيد يتمكنوا من أسر ابن عم ملكة بريطانيا مورهاوس وصحافة العالم تكتب عن فضيحة التاج الملكي البريطاني فى بورسعيد وأسر أحد أفراد الأسرة الملكية تبقى هزيمة نكراء؟ لأ وايه كمان..الجيش البريطاني فتش بورسعيد بيت بيت ولم يجد مورهاوس…عاوز تعرف قصة مورهاوس وحصل له ايه بعد كده؟ إقرأ تاريخ بورسعيد 1956 اللى بتقول عليه هزيمة نكراء…
حكاية بقى كان فاضل سنوات قليلة وتؤل لنا القناة دى أثبت جميع الخبراء الملاحيين والمؤرخين التاريخيين كذبها لأن مشروعات الشركة لتوسيع مجرى القناة وزيادة الغاطس لم تكن تدل أبدا على تسليم القناة بعد سنوات قليلة…ثم ماذا دفع بريطانيا لخوض حرب على مصر والقناة سترجع لمصر بعد سنوات قليلة؟….ياراجل ده جمال بدوى المؤرخ وقطب الوفد والكاره لعبدالناصر أكد فى أحد حلقات برنامج ذاكرة الكاميرا الذى توليت إخراجه وبالتحديد فى حلقة 26 يوليو 2007 أن بريطانيا لم تكن أبدا لتعيد القناة لمصر لابعد سنوات قليلة ولاكثيرة لأن سبب احتلال مصر 1882 كان قناة السويس وتأمين الطريق للمستعمرات فى الهند….
وبعدين قصة السد العالي الذى قضى على خصوبة الأرض الزراعية وكمان كما قال القطب الوفدى مصطفى شردى أن السدالعالى قضى على محصول السردين لأ وكمان حضرتك بتقول إنه اغرق قرى بأكملها…فين القرى دى؟..معلوماتى إن السد العالي منع فيضان النيل واغراقه للقرى وليس العكس فضلا عن توليدالكهرباء…أما بخصوص الطمى وخصوبة التربة فراجع حضرتك محصول القطن وانتاجيته عام 1969 والتى وصلت إلى أعلى إنتاجية للقطن فى تاريخ مصر….
إيه بقى اشكاليتك مع التأمين الصحى؟…هل أخطأ عبدالناصر انه صنع مظلة تأمين للمواطن؟
حضرتك جرب كده تدخل مستشفى النهاردة وتقعد فيها يومين بس 48 ساعة فقط وقل لى فاتورتك كام؟
حكاية بقى حرب اليمن والغطاء الذهبى أنا مش هتعب نفسى معاك فيها…..هسيب خبير عسكرى يشرحها لك لأنك رجل تعتمد على الكلام السماعى المرسل وأنا واثق إن عمرك ماقريت حرف عن حرب اليمن….
فى فيديو على اليوتيوب للفريق سعد الدين الشاذلي مع أحمد منصور على قناة الجزيرة بيشرح قصة حرب اليمن وتكلفتها واكاذيب الإخوان المسلمين وخدامين الملكية والجهلاء بخصوص الغطاء الذهبى…شوف الفيديو وأعتقد أن الشاذلى له مصداقية عند أعداء عبدالناصر…قصة خراب الصناعة بالتأميم تدل على جهل مطبق فالصناعة أوصلت مصر عام 1969 بتقرير الأمم المتحدة الاقتصادى إلى أعلى معدل نمو اقتصادي في تاريخ مصر 6.7 بالمائة لأول وآخر مرة وبلاعاطل واحد…..
حدوتة 1967……اللى الإخوان المسلمين وخدامين الملكية والجهلاء صدعونا بها….عبدالناصر أعلن مسؤليته الكاملة عنها رغم أن جزء كبير من المسؤلية يقع على القادة العسكريين إلا أن عبدالناصر تحمل المسؤولية كاملة واستقال وأبدى استعداده للمحاكمة لكن الشعب رفض وخرج بالملايين وطلب بقاء عبدالناصر الذى فعل ملايذكره ابدا كل من يكتب عن 1967…فعل التالى …….
رأس العش
تدمير المدمرة إيلات…
الاغارة بالطائرات على مواقع إسرائيلية فى عمق سيناء دفع ديان ليصرخ ألم ندمر الطائرات المصرية؟
من أين أتى عبدالناصر بالطائرات؟
إعادة بناء القوات المسلحة….
حرب الاستنزاف……
بناء حائط الصواريخ الذى هو كلمة السر فى نصر أكتوبر وعندما خرج الجيش عنه حدثت الثغرة وفقدنا اللواء 125 مدرع بالكامل….
عملية ميناء ايلات….
طبعا انت متعرفش حاجة عن الكلام ده ياعدو عبدالناصر لأن معلومات حضرتك تجمدت عند 5 يونيو 1967 …..
نصيحتى لك بطل تردد كلام سماعى جاهل يردده الجاهلون..