مجلة الوعي العربي
ياريس غير سكرتاريتك الاقتصادية اللى بيقدموا لكم بيانات ومعلومات مغلوطة،،،!!
ولو مش مصدقنى ابعت اى ساعى من رئاسة الجمهورية لمكتبة معهد التخطيط القومى بشارع صلاح سالم،،،هيلاقى تقارير متابعة الخطة الخمسية الاولى واللى بدأت من منتصف عام ١٩٥٩ حتى منتصف ١٩٦٤، او لمكتبة كلية الاقتصاد والعلوم السياسية هيلاقى رسالة ماجستير خاصة بى قمت باعدادها تحت اشراف استاذى دكتور عمرو محى الدين وناقشنى فيها استاذى الدكتور احمد الغندور،، والدكتور خليل حسن خليل رحمه الله عليهم جميعا وعنوانها دور راس المال الاجنبى فى التنمية الاقتصادية فى مصر ١٩٥٢-١٩٧٧،،،،
وفيهما هتلاقى نسب النمو الحقيقى المحققة خلال سنوات الخطة ، واللى حققت نسبة٦.٥٪ واللى كانت اعلى معدل نمو تحقق على مستوى العالم أيامها،،،
يعنى مصر مافتقرتش منذ التدخل فى اليمن ١٩٦٢ولا حاجة والحمد لله،،،
صحيح ياريس الانفاق على الحروب بيستنزف الموارد،،،بس وجود قطاع عام ،،،وكمان وجود ارادة للتنمية الحقيقية المستقلة مع ارادة المقاومة،،،هى اللى خلت مصر تخوض معارك الاستنزاف والعبور دون ان تهتز اوتركع ودون ان تحمل البسطاء اعباء فوق اعباء،،وتستمر الخدمات التعليمية والصحية على كفاءة عالية،،ومجانية،،،ولم ترتفع فاتورة الطاقة او المواصلات او الغذاء أو غيرها طوال تلك السنوات،،،
واكتر من كده عايز حضرتك تقولهم يراجعوا الانجازات الاقتصادية الكبرى التى استمرت برغم كل تلك التحديات واللى على رأسها استكمال بناء السد العالى الذى اعلن ناصر فى سبتمبر ١٩٦٩ ااكتمال تشييده ليعطى مصر طاقة كهربائية غير مسبوقة واراضى زراعية بملايين الافدنة،،، ويشغل الاف المصانع ،،
كل ده ياريس حصل،،،ولما توفى عبدالناصر فى سبتمبر ١٩٧٠لرحمة الله كانت مديونية مصر الخارجية لاتزيد عن مليار دولار اغلبها مقابل اسلحة سوفيتية كانت لزوم حرب العبور،،،وتنازل الصديق السوفيتى بعد ذلك عن جزء غير بسيط منها،،،،
اقولك ياريس،،،،بلاش تتعب حد ولا يروح ولا ييجى ،،،
اسألهم بس هى اللى الشركات والاصول العامة اللى اتباعت منذ السبعينيات وحتى الان وكمان جزء مهم من المعروض حاليا للبيع تم انشائه من أيام مين ،،،،؟،،،هيقولولك من ايام ناصر،،،
ولما يقولك كده ابقى قولهم :
“إخص عليكم بقى عايزينى اجى ناحية البقية الباقية من الاصول دى وابيع فيها واخصخص انا كمان،،،؟!،،،،عيب عليكم محدش يمس مشروعات المال العام اللى سانده البلد بالبيع او بالخصخصة،،،”
اما بالنسبة لارجاع الازمة لتلاشى غطاء الدهب لاستهلاكه فى حرب اليمن فعايزك تقول للسكرتارية دول :
“عيب عليكم تقولولى كده،،،،ده العالم كله تخلى عن غطاء الدهب بعدما قامت امريكا بالغائه عام ١٩٧٢،،”
عارف ياريس الازمة بدأت من امتى،،؟
من بداية حكم السادات ،،،ايوة السادات اللى انا عارف انك بتحبه جدا وشايفه انه احسن رئيس جه قبلك و اللى شاف ان دور الحكومة الاكتفاء باقامة مشروعات البنية الاساسية مع ترك الاستثمار للقطاع الخاص والاجنبى،،،،وانفاق كل جنيه على اقامة الابنية والمدن الجديدة،،، وبيع الاصول اللى سانده الاقتصاد المصرى ،،،وفى انتظار الاجانب ييجوا يشتروا مصانعنا،،،او يقيموا مصانع جديدة،،،
والحقيقة هم اشتروا المصانع وفكوكوا بعضها،،،وباعوا اراضيها للعقارات،،،او احتكروا انتاجها كالحديد والاسمنت،،،لكنهم محققوش لمصر التنمية الاقتصادية،،،يا ترى ليه،،،،لان ما حك جلدك مثل ظفرك،،،ولازم نعتمد على انفسنا ونصنع ونزرع ومانستناش حد،،، خصوصا اننا عارفين ان راس المال جبان وميحبش ييجى الا فى ظل اوضاع سياسية واجتماعية مستقرة للغاية وده مش متحقق عندنا عشان الارهاب والتوتر المحيط بينا،،،، يبقى نعمل ايه،،،؟!
مش هقولك اعمل زى عبد الناصر عشان انا عارف انك مش بتحبه اوى،،،
هقولك بس ؛
متعملش زى السادات ,،،،ولا مبارك،،،!!
تحياتى ياريس،،،
وتمنياتى بفترة رئاسية أكثر نجاحا من السابقة فى خدمة مصر والمصريين البسطاء،،،
