مجلة الوعي العربي
مقالات مشابهة
بقلم : عمرو صابح
قناة ” القاهرة والناس” تبث نشيد “إسلمى يا مصر” ومركبة عليه صور وفيديوهات لمصر الملكية جايبة فيهم شوارع وسط البلد والأجانب محفلطين وملمعين ومحلات شيكوريل وبنزايون وريفولى وصيدناوى ، وكاتبة عليهم معلومات كلها غير صحيحة ، منها على سبيل المثال مصر كانت مداينة بريطانيا فى الحرب العالمية الأولى بـ29 مليار دولار ، حدود مصر الملكية كانت تشمل السودان وجزء من ليبيا وجزء من تشاد وجزء من أوغندا ، اليابان كانت بتدرس تجربة نهضة مصر ، معدل البطالة كان 2%!!
الموضة كانت بتنزل مصر قبل أوروبا.
وقامت بتسمية كل ده مصر العظمى من 1805 -1952 !!!
اللى يشوف الأغنية الدعائية دى هيقول لما مصر كانت جنة ولا جنة عدن كده ، مين الشياطين اللى انقلبوا على الملكية وأطاحوا بها ، وأخرجوا المصريين من جنتها؟!!
وما الداعى لثورة يوليو وما سر التأييد الشعبي الجارف لها؟!!
مصر العظمى من 1805-1952 اللى شهدت محاربة محمد على فى الجزيرة العربية واليونان كمرتزق لحساب السلطان العثمانى!
مصر العظمى اللى شعبها أطلق على محمد على وهو أفضل واحد من حكام أسرته أسم “ظالم باشا” !
مصر العظمى اللى عظمتها الخارجية كانت قصيرة ولم تتجاوز عقد من 1830 حتى معاهدة لندن 1840 !!
مصر العظمى اللى محمد على حولها لتكية لأسرته من بعده .
مصر العظمى اللى مات من شعبها أكثر من 120 ألف مصري فى حفر قناة السويس بالسخرة!!
مصر العظمى اللى حاكمها سعيد باشا حب يجامل نابليون الثالث فأرسل كتيبة من جيشها تحارب لصالحه فى المكسيك!!
مصر العظمى اللى وقعت تحت إدارة بريطانية فرنسية بسبب ديون اسماعيل اللى ساب شعبها يموت من الجوع والبلهارسيا والكوليرا ،وبنى أوبرا وخطط شوارع وسط القاهرة زى باريس !
مصر العظمى اللى عملت حفلة أسطورية فى افتتاح القناة على جثث 150 ألف مصري علشان اسماعيل كان مغرم بأوجيني امبراطورة فرنسا!
مصر العظمى اللى اسماعيل لما فكر يعمل إمبراطورية له فى أفريقيا فزج بجيشها فى حروب مع الحبشة أبيد فيها الجيش ، وخلقت عداء تاريخى لا ينتهى مع الأحباش وأفلست خزانة مصر وأثقلتها بالقروض!
مصر العظمى التى تم احتلالها عام 1882 من بريطانيا وفضلت محتلة لأكثر من 70 سنة!
مصر العظمى اللى بعتت مئات الألوف من شبابها يعملوا بالسخرة لخدمة حروب بريطانيا فى الحرب العالمية الأولى !
مصر العظمى اللى حاكمها عباس حلمى الثانى تنازل فيها عن العقبة للأدرن وملكها فؤاد تنازل عن واحة جغبوب لليبيا !
مصر العظمى اللى خط الحدود بين مصر والسودان تم إقراره سنة 1899! مصر العظمى اللى جيشها تم طرده من السودان سنة 1924 !
مصر العظمى اللى حكمها مقامر ومكروه حتى من أسرته زى فؤاد الأول اللى اتجوز نازلى غصب عنها ، وخلفوا فاروق قبل ميعاده ، فالشاعر بيرم التونسي كتب لهم قصيدته الباميه السلطانى
والناس قرون كنا نقول مأمأ.. ونأكل البرسيم بالقفة
سلطان بلدنا مرته جابت .. ولد وقال سموه فاروق
فاروق فارقنا بلا نيلة.. دى مصر مش عايزالها رذيلة
البامية فى البستان تهز القرون.. وجنبها الفرع الملوكى اللطيف
نازل يلعلط تحت برجة القمر.. ربك يبارك لك فى عمر الغلام
ياخسارة بس الشهر مش تمام
مصر العظمى اللى الدبابات البريطانية حاصرت قصر عابدين وأرغمت فاروق على تعيين النحاس رئيس للوزراء وإلا سيتم عزله!
مصر العظمى بتاعه الحرس الحديدى المخصص لاغتيال خصوم الملك فاروق حتى لو واحد منهم زى رفيق الطرزى بينافسه على حب راقصه !
مصر العظمى المنتهك سيادتها لخدمة المجهود الحربي البريطانى فى الحرب العالمية الثانية !
مصر العظمى بتاعه الكتاب الأسود لمكرم عبيد عن فساد الوفد وتحكم فؤاد سراج الدين وزينب الوكيل فى النحاس العجوز !
مصر العظمى اللى مات عشرات الألوف من شعبها بسبب وباء ملاريا الجامبيا ثم وباء الكوليرا فى الأربعينيات من القرن الماضى خلال حكم فاروق لنقص الأمصال بسبب خواء الخزينة من الأموال بعدما الإنجليز خدوها وأدونا سندات بدالها!!
مصر العظمى المهزومة فى حرب 1948 أمام العصابات الصهيونية مما ترتب عليه ضياع 78% من أرض فلسطين التاريخية !
مصر العظمى اللى أم فاروق وإخواته سافروا أمريكا وتنصروا هناك وفاروق أسقط عنهم الجنسية واستولى على ممتلكاتهم!!
مصر العظمى مصر فضائح فاروق فى دوفيل وفى النوادى الليلية!!
مصر العظمى مصر الفلاح صاحب الجلباب الأزرق الواحد!!
مصر العظمى اللى النحاس باشا السبعينى فى أخر وزارة ترأسها سنة 1950 طلب فيها من الملك الفاسد فاروق أن يسمح له بتقبيل يده!! فى سقوط أخير ومدوى لحزب الوفد بعدما سيطر عليه كبار الملاك!!
مصر العظمى مصر اللى مشروع حكومتها القومى من ديسمبر 1950 حتى يناير 1952 هو مكافحة الحفاء!!
مصر العظمى مصر إقالة الوزارات برشاوى للملك فاروق من مليون جنيه وأنت طالع!!
مصر العظمى مصر حريق القاهرة وعجز الميزانية سنة 1952 بأكثر من 38 مليون جنيه!!
مصر العظمى مصر التى ظلت تدفع جزية لتركيا الجمهورية حتى بعد زوال خلافة بنى عثمان!!
مصر العظمى اللى كان بيمتلكها 7000 واحد منهم 960 مصري فقط بينما 20 مليون لا يمتلكوا شئ!!
بنزايون يعنى ابن صهيون ، وعدس وريفولى وشملا وشيكوريل دى أسماء لليهود أصحاب المحلات اللى كان بيدخلها ال7000 واحد ملاك مصر فى هذا الزمن الكئيب اللى قناة القاهرة والناس بتصورهم كأنهم الـ 20 مليون مصري!!
ده غيض من فيض تاريخ مصر تحت حكم محمد على وخلفاؤه وهو تاريخ أسود وغير مشرف.
فين الجمعية التاريخية وفين وزارة الثقافة وفين أقسام التاريخ فى الجامعات المصرية من التصدى لتلك السموم التى تصل مباشرة للشباب كحقائق مسلم بها؟!!!.
