رؤية ” جمال عبد الناصر” للحكم بنص كلماته

لماذا يكره سماسرة بيع الوطن “جمال عبد الناصر”؟

رؤية ” جمال عبد الناصر” للحكم بنص كلماته:

“أمامنا طريق سهل .. وطريق صعب .
وعلينا أن نختار.
الطريق السهل هو أن إحنا نبقى حكام .. نوكل الناس ونسكنهم ونعلمهم على قد فلوسهم .. اللى معاه فلوس يأكل ويسكن ويتعلم ويشتغل واللى مش معاه مالوش حقوق عندنا.
لا نعمل خطة تنمية ولا نبنى مصانع ونحول مصر لسوق ونستورد كل حاجة من بره للى يقدر يشترى.
ممكن أحكم بالشكل ده وأقعد وأحط رجل على رجل ، وأعمل مؤتمرات ولقاءات ، وأسافر بره والجرائد والتليفزيون يطلعوا الريس راح .. الريس جه .. وتمشي العملية كده .. ده الطريق السهل للحكم .. أشيل مسئولية الدولة عن كل شئ ، وأسيب الناس تأكل فى بعضها ، وأنا بتفرج ومستمتع بأبهة الحكم والسلطة ، وبستخدم أجهزة الدولة فى الحفاظ على حكمي .. طبعا هيتلم حواليا الإقطاعيين والرأسماليين ، وأقعد معاهم قعدات طرية ومريحة ، ويتخنوا ودانى بكلامهم عن عظمتى وحكمتى وأسلوبي فى الحكم .. طبعا لأن الأسلوب ده هيخليهم هم حكام البلد الأصليين ، وأنا مجرد صورة فى رئاسة الجمهورية.
ده الطريق السهل للحكم .. وأنا مستحيل أمشي فيه وأحكم بالشكل ده.
إزاى أبقى حاكم وأقول والله اللى لاقي شغل يشتغل واللى مش لاقي عنه ما اشتغل .. واللى معاه فلوس يأكل واللى مش معاه عنه ما أكل.
واللى معاه فلوس يتعالج واللى مش معاه يموت من المرض.
واللى عنده واسطة ياخد حقه واللى معندوش مالوش حقوق فى البلد.
إزاى أخلى التعليم بالفلوس ؟ والوظيفة بالواسطة وبالفلوس؟! والعلاج للقادر على دفع ثمنه بس؟!!
إزاى أحترم نفسي كحاكم ورئيس للجمهورية وفيه ناس معاها كل حاجة وناس مش لاقيه حاجة والإتنين مصريين ومسئولين منى بحكم سلطتى؟!!
أنا مسئول عن الجميع .
كل خريج لازم يشتغل .. كل واحد لازم أوفر له الموارد اللى تخليه يأكل ويلبس ويتجوز ويتعالج ، وده مش هيتم غير بالعمل الجاد وبتكافؤ الفرص فى التعليم وفى التوظيف وفى المساواة أمام القانون.
أنا ثائر ولم أفكر أبداً إنى أبقى حاكم.
أنا لست هنا عن طريق الحكم .. ولكن عن طريق الثورة.
الحكم هو البحث عن الذات .. والثورة هى البحث عن الشعب.
وأنا اخترت طريق البحث عن الشعب .. طريق الثورة.
أنا اخترت طريق الشعب .. طريق الثوار .. وهو الطريق الصعب”.
—-
” جمال عبد الناصر “